2025 жылдың 28 наурызында С. Д. Асфендияров атындағы Қазақ ұлттық медицина университетінің Фармация мектебінде «Фармациядағы білім, ғылым және тәжірибе интеграциясы. «Фармация» бағыты бойынша білім беру бағдарламасының сабақтастығы» тақырыбында дөңгелек үстел өтті.
Іс-шараға еліміздің медициналық колледждерінің өкілдері мен фармацевтикалық білім беру саласының жетекші мамандары қатысты. Кездесудің негізгі мақсаты – колледждердің фармацевтикалық білім беру жүйесін бакалавриатқа интеграциялау, білім берудің сабақтастығын қамтамасыз ету және оның сапасын арттыру.
Талқыланған негізгі мәселелер:
• 6B10104 – «Фармация» білім беру бағдарламасына талдау жүргізу;
• Колледж студенттеріне арналған «Фармакогнозия» жаңа оқулығын таныстыру;
• Фармацевтикалық білімнің негізгі пәндері бойынша оқу құралдарын әзірлеу және басып шығару;
• Колледж оқытушыларының академиялық біліктілігін арттыру;
• Фармация саласында бірлескен ғылыми зерттеулер жүргізу мүмкіндіктері;
• Колледж түлектерін бакалавриатқа, оның ішінде «Фармация» бағытына оқуға тарту және кәсіби бағдар беру.
Дөңгелек үстел барысында қолданыстағы білім беру бағдарламасына талдау жасалып, оны жетілдіру және халықаралық стандарттарға бейімдеу жолдары қарастырылды. Фармация мектебінің деканы З.Б. Сакипова оқу бағдарламаларын үйлестірудің, фармацевттердің зертханалық және клиникалық дайындығын күшейтудің, сондай-ақ білім беру үдерісіне ғылыми әдістерді енгізудің маңыздылығын атап өтті.
Кездесу қорытындысы бойынша келесі бағыттар айқындалды:
1. ҚазҰМУ мен Қазақстан Республикасының медициналық колледждері арасында «Фармация» бағыты бойынша білім беру бағдарламасын жаңарту бойынша бірлескен жұмыс жүргізу;
2. Фармацевтикалық кадрларды даярлау сапасын арттыру бойынша ынтымақтастықты дамыту;
3. Оқу құралдарын коллабрациялық әзірлеу және шығару, оның ішінде қазақ тілінде басылымдар дайындау.
Іс-шараға Қазақстан Республикасының медициналық колледждерінен және фармацевтикалық қауымдастықтан 40-тан астам өкіл қатысты. Фармациядағы білім, ғылым және тәжірибе интеграциясы мәселелері жұмыс кездесулері мен ғылыми зерттеулер форматында әрі қарай жалғасады.
